|
 Konün
mew tüfachi pukem küyen’, epu mari kiñe antü konle, ka
epu mari meli antü konle, akuay we tripantü. Feychi meli
antü mew, zoy mülekey newen Wallmapu mew, ka zewma
afpüle pun, epu mari meli konle, feytichi newen zoy
newentuay. Feymew ayüwtukey mapu, mogetukey
itrofillmogen, ka wegetukey mapuche ñi püllü pikey taiñ
wünenke che yem.
Akun mew tüfachi we tripantü, mapuche ñi we tripantü,
kompüle ayüwgechi rakizuamkey pu mapuche ñi kuyfike
zugun ñi kuyfike gülam. Akukey rakizuam mew taiñ wünenke
che yem, taiñ fütake logko, rakizuamal ñi pu püñen egu
ñi mülerpual ka antü kom püle zoy küme mogen. Wallmapu
mew kay petu feyentulekalu ñi mülen kümeke newen, waywen
kürüf reke akukey newen, ñi mogeltual kuyfike rakizuam,
tañi wegetual mapuche.
We tripantü mew wegetukey mapu, ayüwtukey lelfün pikey
taiñ wünenke che, feymew wegetukey ñi ülkantun üñüm,
choyütukey folil, ayüwkey mapuche ñi piwke. ka küpan mew
tüfachi küyen’ mew, fütake mawün, fütake kürüf,
liftukeygün kom taiñ Wallmapu.
Feykay mülelu ka wezake newen, wezake che, petu ayetu
mekefilu taiñ mapuche gen, l’agümmekelu itrofillmogen,
kümey taiñ afnoal taiñ weychan, igkamekeal taiñ mapu,
taiñ itrofillmogen. Wegetupe may, tüfachi we tripantü
mew taiñ weychan, newen tupe taiñ weychafe, müley ñi
igkaneafiel taiñ gen’ ko, gen’ mawiza, gen’ wigkul, taiñ
Wallmapu. Müley taiñ wewafiel wezake newen, ka wewafiel
taiñ kayñe.
Feymew kümeafuy ka taiñ rakizuamafiel kom inchiñ, ñi
chum amulen taiñ zugun Wallmapu mew, müley ñi
gütramkamekeal, ñi gülamtumekeal ñi chum künual taiñ
zugun Wallmapu mew. Kümeafuy norkünuliyiñ taiñ zugun,
kiñewtuliyiñ rakizuam mew, feymew ka antü zoy newentuay
taiñ zugun, ka wenuntuay taiñ mapuchegen.
Ñi newentual taiñ mapu, müley taiñ küzawal kom inchiñ,
lelfün mew ka waria mew, kümey taiñ kelluwal mapuchegen
mew. Mülele kiñeke che kimnole ñi tuwün, ñi küpalme,
kümey taiñ kimeltuafiel chem tuwün niel, chem küpalme
gefulu yem. Mülele ka kiñeke mapuche yem wigkawtulu
rakizuamu, yewetulu ñi mapuchegen mew, kümey ñi
kelluafiel ñi rüpütual, mapuche getupe egün. Ka mülele
kiñeke che mapuche genofule rume, welu mapuche rakizuam
gele, mapuche püllü gele, kümey taiñ fawpüle piafiel,
mapuchetuafiel. Femgechi rakizuamliyiñ ka antü aflayay
mapuche.
Müleyiñ inchiñ mapuche, günechen ñi zuam mew, ka taiñ
fütakeche ñi zuam mew, elkünuygün gülam, elkünuy kimün,
elukünuliyiñ mew mapu. Ayüwgechi rulpayaymün we tripantü
pigün; pürüaymün, ülkantuaymün. Welu ka rakizuamaymün
kom tamün pu che pieyumu tati. Feymew kümey taiñ
rakizuamafiel kom taiñ wünenke che, wünenke logko, müley
Leftraru, Pelantraru, Magiñwenu, Mariluan, Kallfükura,
Wentekol, Küzel, Külapag, Puram, Foyel, Zayweke, Kollüw
Kotar, Wirio Lienan, afkinolpe ñi rakizuam egün,
afkinolpe ñi gülam egün.
Felepe may….
WALLMAPUWEN
Wallmapu, Pukem Küyen
Volver Portada
|
